georges schummer www.busbunn.net  Mon Aug 14 10:18:49 2006 Date
Message Aus dem Forum vun der Stad Lëtzebuerg:
D'Nei Bréck, mat oder ouni Tram?
Auteur: georges schummer (IP enregistrée)
Date: 1 August 2006, 22:33

Et stelle sech just e puer Froen:

1. Ass et richteg, déi „Nei Bréck“ wéi geplangt ze sanéieren?

Ech ménge jo, mir hu kaum eng Wiel, wa mir se erhale wëllen.

Näischt maache géif de sechere Verfall bedeiten, an da misst se fréier oder spéider wéinst Baufällegkeet ganz ofgerappt ginn. De kléngste Kompromëss ass op d’manst d’Silhouette dervun ze erhalen, als historescht Baudenkmal, dat d’Bild vun der Stad prägt.

Och wa mir dat schéint Konzept vun engem renge Steebou opgi mussen, woumat virun engem gudde Jorhonnert de franséischen Ingénieur Séjourné sech géint de lëtzebuerger Ingénieur Rodange vun der P&Ch duechgesat huet. Dee wollt virun 100 Joer schon eng Stolbetonsbréck mat Hastengverkleedung bauen. Déi „Nei Bréck“ war mat hirer Portée (Spannweite : 84,55 m) deemols e Rekord fir e renge Steebou.

100 Joer ass e schéinen Alter fir eis al Damm. Och wann eng Stolbetonsbréck gebaut gi wir, wier se haut wuel net manner baufälleg. De Betong an d’Eisebewehrung haten net déiselwegt Qualitéiten wéi se haut ze erreeche sinn. Awer och nach haut gëtt déi geplangte Liewensdauer vun neie Brécken kaum méi héich ugesat, egal aus watfir engem Material se bestinn.

Trotz alle Fortschrëtter an der Bautechnik géife mir et haut kaum nach färdeg bréngen, esou eng Bréck als renge Steebou ze bauen. Et war eng haaptsächlech op Erfahrungen opgebauten empiresch Technik, déi mir ganz einfach net méi uwenden därfen. D’Standsécherheet géif sech mat häitege Baunormen kaum rechneresch noweise loossen, et sief dann mir léissen eis, wéi mir et hei zu Lëtzebuerg gewinnt sinn, dat „Gutachten“ schreiwen, dat mir bräichten.

Mir kommen also op de Stolbetong zréck, e Material mat dem mir eens ginn an dat mir esou berechne kënnen, datt et all normativ Ufuederungen erfëllt. Mee maache mir eis näischt vir: Just déi baussendzech Steng vum Bréckebou solle stoe bleiwen. Wéi déi beim Ausbrieche vun de Steng bannen am Bou eleng stoe bleiwe sollen, an härno, méiglecherweis ofgestäipt, als Schalung fir de Stolbetongsbou dénge sollen, kréie mir net matgedeelt. Firwat solle mir dat och wëssen? Dat geschitt wuel alles hanner Sichtschutz-Baatschen, an härno brauche mir eis nëmmen nach virzemaachen, do stéingen nach di al Steng. Awer dat gleewe mir gär, well mir kënnen den Touristen dat erzielen, déi stelle sech scho keng Froen. Och wann et sécher méi bëlleg wir, d’Bréckebéi einfach och neizebauen, hu mir dann eppes fir den Denkmalschutz gemaach.

2. Ass et sënnvoll, déi nei Stolbetongsbréck och fir en Tram ze bemiessen?

Ech ménge jo, well ee méiglechs fir all spéider politoko-urbanistesch Entwécklungen virbereet si soll, och wa mir dat elo nach net ofgesi kéinten. Souwisou dierft, bei gläicher Bréckebreet wuelverstan, den Ennerscheed vun de Käschte kaum an d’Gewiicht falen. De groussen Deel ass souwisou Eegegewiicht vun der Bréck (Stolbetong a Sténg). Souguer wa keen Tram agerechend géif, wieren d’Verkéierslaaschte kaum méi kléng. Amplatz vum Tram misst op d’manst e 60- an en 30-Tonnen „Schwerlastwagen“ agerechend ginn. Ouni Berücksichtigung vum Tram kënnte fir den Neibau wahrscheinlech just e puer Bewehrungseisen agespuert ginn, wann iwwerhaapt. Wann de Präis vun der Bréck duerch den Tram härno ee Prozent méi déier kéim, géif dat net dem Faass de Buedem ausschloen.

3. Ass et da sënnvoll, op der „neier Bréck“ en Tram virzegesinn?

Hei mengen ech eendeiteg neen, an zwar aus verkéierstechnesche Grënn. D’„Nei Bréck“ ass net breet genuch fir d’Autoen an den Tram zugläich. Also misst d’Bréck wéinst dem Tram méi breet gemaach ginn. Oder déi Bréck, déi zur Déviatioun vum Verkéier während der Bauzäit provisoresch virgesinn ass, misst härno stoe bleiwen. An dat géing béides onmoosseg an d’Geld.

Awer déi zousätzlech Käschte wiere souwisou fir d’Kaatz. Och wann de Fläschenhals „Péitrussdall“ behuewe wir, géifen sech anerer opdinn. Fir 2 Autosspueren an der Avenue de la Liberté fräi ze maachen, fir do en Tram fueren ze loossen, gëtt et zur Zäit keng pratikabel Léisung. Déi onbehollefen Diskussioun dréit de Moment ëm eng Verbreederung vum Boulevard de la Pétrusse vun der Spuerkees bis op d’Rocade, déi dann op 2 Niveauen ausgebaut gi misst. Ofgesinn dervun, dat esou eng Léisung technesch an urbanistesch net machbar wier, sinn déi zousätzlech Käschten fir d’Tramsléisung néierens erfaasst.

Dat selwecht gëllt fir ongeléisten an onchiffréiert Problemer vum Tram an anere Staddeeler. Huele mir emol nëmmen als Beispill déi „Rout Bréck“, wou den zousätzleche Verkéier no der Ouverture vun der „Nordstrooss“ am Joer 2012 endgülteg zesummebrieche wärt, schon ouni datt een op der „Rouder Bréck“ zwou Spueren fir den Tram ewechhuele géif.

4. Wat ass ze maachen?

Firwat dann net emol de Groussdeel vum ëffentlechen Transport vun der „Neier Bréck erofhuelen. Nom „Bus-Bunn“- resp. RER-Konzept ginn duerch d’Eisebunnstunnellen ënner der Stad keng zousätzlech Verkéiersfläche fir den Tram gebraucht. Dat gëllt beispillsweis fir de Péitrussdall, wou den Zuch niewt der „Neier Bréck“ ënner engem Waasserfall vun der Péitruss erduerch fiert, fir d’“Rout Bréck“ wou d’Eisebunn op engem niddrege Viadukt iwwer d’Uelzecht fiert, wéi iwwerhaapt och fir de ganze Stroosseverkéier an der Stad. Duerch déi zousätzlech ënnerierdesch Verkéiersflächen géif den Uewerflächeverkéier entlaascht, och zum Virdeel vun der „mobilité douce“, de Foussgänger an de Cyclisten.

Nach eng läscht Fro: Huet schon iergendeen probéiert ze chiffréieren, wivill déi 7 m breet Sträif Terrain vun der Foire iwwer de Kierchbierg, de Stadzentrum, d’Gare Centrale, Hollerech an de „Ban de Gasperich“ bis op den Houwald wert ass, déi do fir den Tram gebraucht géif. Nom Konzept BB/RER mussen déi Flächen net geaffert ginn, well hei zousätzlech Verkéiersflächen geschafe gínn.

Georges Schummer, Auteur vum Projet BB (Bus-Bunn)



In order to delete above message, please introduce Admin password:

  /!\ WARNING /!\  
You won't be able to recover this message anymore!.


Modify/Delete entry

Modify entry
Delete entry
Admin Password:

[Back to book]


Y-a-p-Gb